Магӏалбике кхолламий ишкол хьалъярга хьожаш хилар, мехкада Келаматанаькъан Махьмуд-Ӏаьла
Керда, кхолламашта лаьрхӏа ишкол хьалъеш болх ба, тахан Магӏалбике дӏахьош. Цигарча балхага хьажа ваха хилар вай Мехкада. Таханарча ханага хьежжа хургйолча гӏишлон лаьрхӏа хьахьожадаьр 590 млн сом рузкъа да, хӏаьта болхлой карарча хана хьалхара балхаш дӏадоладаь боахк цига. Шахьара доккха совгӏат хиннад ала йиш я цох, хӏана аьлча къаьнарча ишкола истори 1954-ча шергара хьадоагӏаш дар. Цу хана денз, лакха начӏал дола дукха къонабараш арабаьннабар цу чура, тахан вай республикан, Россе культура йовзийташ болх дӏахьош ба уж тайп-тайпарча моттигашка.
«Итташ шераш дӏадахар, ишколан ший гӏишло йоацаш. Цхьацца нийсъеннача моттигашка къахьегаш хулар бераш. Бахархошца хиннача кхетаче дехар дир сога; из гӏулакх аттачахьа даккха, аьнна. Къаман проектага гӏолла болх дӏахьош ишкола лаьрхӏа гӏишло хьалъеш боахк тахан. Таханарча заманга хьежжа йолча ишколе; ашарий, хореографе, иштта кхыйола урокаш дӏакхахьа йиш йолаш хургба шахьаре.
Карарча хана цига дешаш дараш 140 бер да, царца къахьегаш ва 20 хьехархо. Кхы а 250 бер да хореографех йолча урокашка хулараш», - язду вай Мехкадас ший телеграм- оагӏон тӏа. «Дезалера лерхӏамедараш, культуран оагӏонцара гӏулакхаш» яхача моттигерча проектага гӏолла дӏаболабаьб болх.
«Цаӏ йолча Россе» хьаллоацаш, «Дезал» яхача президентски проекта юкъейодаш я из къаман проект. Мехкадас белгалдир, кхолламий оагӏошца бувзам лоаттабеча берашта иштта ишкол хилар лоархӏаме, цар оагӏув хьаллоацаш долга. Республикан кулгалхочо хьоахадир, ишкол хьаеллара кхетаче, бераша дакъа лоацаш, цар дегашта тоам беш, дӏаяхьа езилга.
