Из вӀашагӀъеллаяр мехка паччахьалкхено, иштта цу юкъе дакъа лаьцар культуран министерствос, кагирхой гӀулакхашта йолча комитета. Цига баьхкабар Россе Турпалхой, СВО доакъашхой, цар дезал, дукха бераш долча фусамашкара нах, иштта республикан тайп-тайпарча юкъарча, паччахьалкхен гӀулакхаш тӀара викалаш, цига хилар «Сердало» газета корреспондент а.

«Вай республике 33 эзар совгӀа дукха бераш дола фусамаш я. Из йоккха ганз я! Дезал - мах баь варгвоаца беркат, цо лу берашта, боккхийчарна дега йӀовхал, безам, аьттув. Карарча шера, Россе президента Путин Владимир Владимировича вай массане уйла тӀахьийхар, дезала лоархӀама, дезала лерхӀам беш хилара, цӀагӀара аравоалаш ший нана мархӀа а елла, барт баьккха, из хьастара, цунга велавалара. Массайолча хана йӀовхал латтийла шун фусамашка, гӀад а ухаш, дахалда шо даьшта карагӀдоалачох, берий деларах, вай мах баь даргдоацача даь-дас, даь-нанас луш болча хьехамах», - аьлар, гулбеннарашка ше къамаьл деш, Келаматанаькъан Махьмуд-Ӏаьлас.

Иштта, цу кхетаче къамаьл деш, белгалдаьккхар таханарча денга кхоачаш вай республике даь даьннар, хӀанзчул тӀехьагӀа кхоачашде дезар. Республикера дезал хьаллацара даькъе наьна а бера а вахара хьалаш тоадара карагӀдаьнначох а дийцар.

«2019 шера ГӀалгӀай мехка наӀараш хьайийллар 44 берий бешо, таханарча дено дӀадеххача беса хоза хьалъяьча 47 ишколо. Дукха да, дезала шу яхача программа чудоагӀаш, тахан де дезар. Еррига уйла тӀаерзаяь я юкъара гӀулакх дегӀадоаладара. ЦӀай хилара белгало хоалуш яр гулбеннарашта, хьаьшашта, дезала шу хьаделлаш, Хамхой Ахьмада цӀерагӀча Паччахьалкхен филармоне артисташа гойтача концертах.

Цига бар республике цӀихеза артисташ Имагожанаькъан Осман, БӀарахой Люба, ГӀалгӀайчен цӀихеза артисташ Беканаькъан Рахьман, Налганаькъан Лема, иштта кхы дуккхабараш. Из кхетаче вӀашагӀъеллараша совгӀаташ дир Россе турпалхошта, СВО доакъашхошта, дукха дезал барашта. Берригаш а шоай къамах, дезалах, мехках доаккхал деш, дегагӀозалца дӀа-юха къаьстар.