ГӀалгӀайчен Кулгалхочо кхалнах даькъалабийцар наьна денца
Келаматанаькъан Махьмуд-Ӏаьлас ГӀалгӀайчен кхалнах даькъалабийцар, наьна ди долаш, цо белгалдир, цар къахьегам вӀалла а кхоача ца луш хилар, отпуск а салоӀа ди а доацаш, къаьстта цудухьа ба уж мах баь варгвоацаш, аьнна, яздаьд ший телеграм-канале региона кулгалхочо.
«Оаш, дезал кхебеш, юкъехьош дола дакъа мах баь варгвоацаш да: шун безам, теркам, эшача тхо хьаллацар, сабар, чам бола даар кийчдар, хьаькъал - цу дерригне дӀайол хургйолча тӀехьен лард. Боккхача дезалий ноаношта оал аз баркал. Массайолча заман чухь турпалхой ба уж.
Цар дикача дегаша новкъостал ду хӀара денна хьалхашка нийслуш йола вахарера халонаш тӀехьайита», - аьнна яздаьд ший хоама тӀа ГӀалгӀайчен Кулгалхочо.
Цо иштта баркал аьлар ноаношта, цар денал дола къонгаш бахьан, Даьхе лораеш, тахан майрал гойташ латта бизза бола къонахий бахьан, иштта царна могашал, ираз кхайкадир.
«Тахан са безам ба сай нана Келаматанаькъан Аминат даькъалаювца. Нана, хьо эггара са вахаре езагӀа йола саг я. Аз хоастам бу вай Далла, хьо сайца йолаш, се хьо йолча массахана ва йиш йолаш хиларах, хье йолча со веча хьо гӀадйодаш хиларах. Баркал хьона массадолча хӀамах!» - аьлар Келаматанаькъан Махьмуд-Ӏаьлас.
