МЧСа болхлоша цӀи ялара духьалара болх дӀахьу
Республике цу гӀулакхага хьажа декхарий болча наха цӀи ялара духьалара болх дӀахьу. МЧСа болхлоша, газага хьожарашца, электросетей, доал деча даькъ тӀарча администраце болхлошца, цӀеннах чуувтташ, бахархошца болх дӀахьу, уж хьож газа а тока а гӀирсаша мишта болх беш да. Дукха ха йоацаш, Наьсаре Базорканаькъан урам тӀа латтача дукхаза вӀаштӀара даьча цӀагӀа аргӀанара рейд дӀайихьар, цох дийцар «Сердало» газета корреспондентага чоалханерча хьалех болча боахама зарбан болх лелабераша.
Укх наькъа, массаза санна ГӀалгӀай Республикан МЧСа болхлой хьалха а болаш, Наьсарен администраце чоалханерча хьала йолча отдела, Наьсарен ВДПО болхлой а царца арабаьлар.
Бахархошта хьалхадаьккхар, газ а электроэнерги а лелаяр мишта хила деза, нагахьа чоалхане хьал нийслойя, фу де деза. ЦӀаькха а царна хьалхадаьккхар, цӀи ялара кхерамзлен бокъонаш хӀара сага ховш хила езилга.
«Рейд дӀахьош, бахархошта вахара моттиге лелае езаш йола цӀи ялара кхерамзлен бокъонаш тӀайола каьхаташ делар», - аьлар республикан МЧСе.
