Магӏалбика мэр хьежар хоржамий моттигаш кийча йий
Магӏалбик-Шахьара администраце кулгалхо Боканаькъан Мухьмад хьежар хоржамий моттигаш кийча йий. Из ше вахар къаьстта цу моттигашкара хьал довзара, кийчо мишта яьй хара, шахьара бахархошта малагӏа хьалаш вӏашагӏдехкад ха.
«Лоархӏаме да, кхадж тоссача деношка, кхадж тасса боагӏарашта новкъадараш юкъе а хургдоацаш, деррига дика дӏадахьар. Шеддоа хаттар аз теркама юкъе лоаттаду. Со се а ва №8 йолча берий беша даькъ тӏарча №419-ча хоржамий даькъа тӏачӏоагӏваь. Кхадж тасса а воагӏаргва, сай граждански декхар кхоачаш а дергда. Со тешаш ва, тхоай шахьара бахархой цига хьа а бехка, кхадж тасса раьза хургхиларах», - аьлар «Сердало» газетага администраце кулгалхочо.
Кхадж тоссача деношка Магӏалбике хьаделларгда 21 хоржама дакъа. Шоай граждански декхар кхоачашде таро хургья 28 040 хоржамхочун, уж ба шахьаре дIаязбаьраш. Шахьара администраце Магӏалбика бахархой тӏахьех, цу деношка дика дакъа лаца, юстара ца хулаш, массане кхадж тассара. Деррига доакъош, цу гӏулакха ӏалашо еш, из болх къаьга дӏахьош хургда.
