Шолжа-Шахьарера МагӀалбике бода никъ тоабеча, ваха хилар шолжахой мэр
«Шолжа-Шахьар-Горагорск-МагӀалбик» яха никъ тоабеш латт мехка. Шолжа-Шахьара кулгал деш вола Ӏумаранаькъан Аслан, ший гӀонча волча Беканаькъан Халидаца, из болх малагӀча боараме дӀахьош ба тахка ваха хилар.
Йоккхий моттигаш хотташ бола из никъ лоархӀаме ба. 22,6 км кхоачаш ба хувца беза никъ. Шин даькъаца дӀахьош ба из лоархӀаме болх. ДӀадахача шера 10 км кхоачаш бола никъ тоабеш болх чакхбаьккхар, хӀаьта укх шера болх дӀахохьош ба биса 12,6 км бола никъ меттаоттабеш.
Никъ кердабаккхарал совгӀа, гӀашлой наькъаш дехкаш, нах дехьабувлаш йола моттигаш белгалъеш, наькъашка басарашца къоастам беш, гонахье тоаеш къахьегаргда цига.
Укх шерарча Ӏан хьалхарча бетта кийча хила безаш ба никъ, хӀаьта таханарча цигарча хьало хьагойт, йиллача ханал хьалха никъ йистебала мегаш болга. Шолжа шахьарера МагӀалбике кхачар дикка аттача доаккхаш хургда из гӀулакх.
Юртара моттигаш тоаярах йолча федеральни программага гӀолла дӀахьош ба из болх.
