Вай мехкахочун ахча лочкъадаьд йоаца мебель йохкача кхалсага
Социальни бувзамашка гӀолла, аргӀанара тийшаболх баь, ахча даьккхар юха а. ГӀалгӀайчен Шолжа полице лохаш я, ше гаьна а йолаш, 27 эзар сом ахча тийшача балхах лочкъадаь кхалсаг, яхаш, дийцар «Сердало» газетага мехка МВД.
«Шахьара полице ена хилар моттигера яхархо. Цо хоам бир, малий ца ховча кхалсага, «Mebel lӀkvӀdacӀa» яхача социальни бувзамга гӀолла, дика йовзаш йола мебель шийга йохкаргья, аьнна, ахча даккхара хьакъехьа. Кхалсаг тийшай, из шийна дика нийслуш хиларах, цо цунна дӀадахьийтад 27 500 эзар сом. ДӀахо массаза санна хиннад: наьха ахча хьа а ийца, «дохкархо» эцархочунцара дӀахора бувзам ходабаь Ӏохайнай», - аьлар бокъонаш лораераша.
Полици къахьегаш я хӀилла йийца дохкархо лаха дагахьа. Юха а хьалхадоаккх бахархошта, малаш ба ца ховча нахагара онлайн оалача кепара эцар-дохкар яха моттигаш ма лелае, шоаех дола хоамаш царга дӀа а ма тела. ХӀара бӀаьшерен технологеш хувцалуш йоагӀа, бакъда «ворхӀазза диста, цкъа хоададе» яха хьаькъалера дешаш вайна юкъе хӀанз а дахаш да.
