Эггара хьалхарча аргӀагӀа тоаде дезаш латтарех дола Наьсарера, Магасера наькъаш да кердача куца тӀа доаладе лаьрхӀараш», — дийцар тхога наькъий гӀулакхах йолча министерствон болхлоша. «Бахархошца бувзам лоаттабеш, къоастаю наькъашкара тоае еза моттигаш. ХӀара дийнахьа цу наькъашка гӀолла дӀа-хьа ухача наьха хьашташ да эггара хьалха теркалде дезараш. КӀоагаш даьнна, деха латтача наькъаша; урама куц ийрчадаьккха ца Ӏеш, машенашка авареш яйт, гӀаш леларашта йоккха хало ю. Къаман проектага гӀолла из хьал дикка аттачахьа даккха аьттув баьннаб вай, хьатӀадоагӀача шера а дӀахохьоргба из болх», — белгалдир вай Мехкадас Келаматанаькъан Махьмуд-Ӏаьлас. ХӀара хӀаман зем боаккхаш, дӀахьоргба из болх. Асфальт хувцаш, тротуараш тоадеш, остановкаш меттайоалаеш, басарашца наькъашка белгалонаш еш, тишъенна гӀирмаш (хӀаракаш) хувцаш. Лакхача боараме чакхбаккха безаш ба из болх. ЛерттӀача хьале хила деза республикера наькъаш.