Любимова Ольга кертте латт гӀалгӀай паччахьалкхен бӀаь шу дузаш хилара цӀайга кийчо еча, из вайцига ена хиларах, дӀахо цу цӀайца ювзаенна дӀахьоргйолча мероприятеех а дийцар цунца. «Тхо дукха хӀама кхоачашде лаьрхӀа да, иштта Россе культуран министерствос новкъостал деш хилча хӀаьте а. Республике «Культура» яхача къаман проекта чуйоагӀаш, керда культурно-салоӀама урхалленаш хьалъе лерхӀ, ГӀалгӀайчен кхоллама коллективай, кхыча республикашка дӀа-юха лела таро хургйолаш. Вай даьша йита, мах баь варгвоаца ганз я культуран тӀехьале, тха декхар да из лораяр. Цу гӀулакха а накъаяргья Магасе хьалъе лерхӀаш йола керда мохк тохкаш йола музей. Россе министра а шийгара чӀоагӀа терко тӀайохийташ дола хӀамаш юкъедоаладир. Тхоашта хетар оаха а аьлар», - белгалдир Келаматанаькъан Махьмуд-Ӏаьлас. Россе культуран министр, ГӀалгӀайчен Паччахьалкхен мохк тохкача музее яхача хана, цун кулгалхочо Саганаькъан Мухьмада аьлар, хӀанзарча музея тӀема сийлен майдаш, къаьстта из бахьан долаш музей хьакхелла хилар дӀа а лоархӀаш, шоаш йолчча тайпара йита, аьнна. Любимова Ольгас из, дика хеташ, тӀаийцар, тӀехьара тӀа аьлар, царех цхьа дакъа лаьрххӀача операцен доакъашхошта хетаде деза, аьнна. Тхона ловра, музей санна йолча моттигий болхлой шоай мехках, цун исторех, тамашийнача археологех, артефактах, хӀанз а кораеш латтача хӀамаех дувца таронаш совйоалаш хилар», - аьлар дӀахо Любимова Ольгас Магасе, музея кердача гӀишлонга хьожаш.