Къахьегамах йолча министерствос наха новкъостал дара наькъаш белгалдир
Укх деношка ГӀалгӀайчен къахьегама министерстве баьча балхах дувца гулбелар МутаӀаланаькъан Хьажбикара кулгал деш бола балха новкъостий, цига дийцар дӀадахача 2023 шера баьча, карарча 2024 шера бе безача балхах, яхаш, дийцар «Сердало» газетага цу боахаме.
«2023 шера, вайна карагӀдаьлар тайп-тайпарча наха вахарца дувзаденна новкъостал де, реабилитацена юкъеболха нах мах боацаш дӀа-юха кхувлара ворхӀ миллион совгӀа, иштта вахара-коммунальни хьалех дола 722 миллион совгӀа сом а ахча хьожадир. Вай хьинаре болх баьб къахьегама рынкера хьал аттача доаккхаш, цу даькъе вахарца ювзаеннача контрактий программан новкъосталца, цунна чудоагӀаш, 2023 шера 2449 контракт чӀоагӀъяьй, цо таро хилийтар итт эзар совгӀа саг чулаца, - аьлар ГӀалгӀайчен къахьегама министра.
Цо белгалдир, боахамаша кертте оттадеш дола декхар, нах бахача моттигашка, таро йоацаш болча наха социальни гӀо лоаттадар долга.
ДӀадахача шера, цу тайпара новкъоастал таро йоацача наха лоаттадеш, дукха болх бе бийзар, мехка бахархой вахаре эшачунга гӀолла теркалбеш хилар даим.
«2024 шера вай де дезар дукха да, цудухьа мел бола низ а теркам а цу тӀа бохийтаргба вай, наха социальни гӀо дара», - аьлар МутаӀаланаькъан Хьажбикара.
