Илдарха-ГӀалий тӀа, лорий болам дӀахьу унахцӀенон министерствос
Таханарча дийнахьа денз, наджгоанцхой бетта 22 денга кхаччалца, республикан унахцӀенон министерствос, Илдарха-ГӀалий тӀа цхьацца кхетаченаш дӀахьоргья. Уж лаьрхӀа я наьха унахцӀено тоаяра. Из хоам бир «Сердало» газетага боахама зарбан болх лелабераша. Илдарха-ГӀалан бахархой дӀаболабелар «Онкопатруль» яхача гӀулакха юкъе дакъа лаца.
«Из болам дӀахьош хилар бахьан да, цӀийоацар оала лазар дараш хьаллацар, цу лазара наьха терко тӀаозар. Болама чуйоагӀаш я лаьрххӀа йола мобильни моттигаш, цига хӀара сага таро я мах боацаш лорашка чакхвала, лорий хьехамга ладувгӀа, иштта цӀийоаца лазар шоашта дий хьажар», - аьлар республикан унахцӀенон керттерча фусаме.
Кхоана а ломма а «УнахцӀенон цӀерамашин» яха акци дӀахьоргья юха а Илдарха-ГӀалий тӀа. Цига, 10 сахьат даьлча денз 16 сахьат даллалца йолча хана, безам бараш, мах а боацаш, лорашка чакхбала а царца дагабала а йиш йолаш ба. Цу боккхача болама тӀеххьара ди хургда наджгоанцхой бетта 20-гӀа ди.
Цу денгара дӀадоладенна, 10 сахьат даьлча денз 18 сахьат даллалца «Дега шоатта ди» яха болам дӀахьоргба, из дӀахьош наьха таро хургья шоай цӀий дистийта, пхаьнаша мишта болх бу ха, дега лазар дий хьожаш ЭКГ яккха. Безам болча наьха таро я, дегаца дувзаденна лазараш дий хьажа, шоай могашал лораяра де дезар довза.
