Карарча хана пхе лорий организацешка республике гIолла 356 моттиг я, цу юкъе 37 реанимацеш, таханарча денна 9 моттиг мукъа я, из я 9%. Нагахьа санна, эшаш хуле кхы а тIатохаргъя.

Цунах дийцар премьер-министра Сластенин Владимира кулгал а деш дIадихьача пленарни вIашагIкхетаре УнахцIенон министра ТIоаршхой Рукъета.

Министра яхачох, денна-бийсана из лазар дий хара тесташка хьожаш бола болх вIашагIбеллаб, цу юкъе салоIама денош а дац, кхойтта лаборатори а я къахьегаш.

Из лазар дIадоладелча денз 381 286 тохкам баьб, цу юкъе 1168 тIехьарча денна-бийсана, царех лазар долга гучадоакхаш яь биопробаш — 56.

Амбулаторни дарба дара эшача молхашца Iалашо яьй шин бетта тоъаргйолаш, цу юкъе пхе бетта лаьрхIа лазар хьакхетаргдоацача тIабувхача гIирсаца. Россе УнахцIенон министерства оттабаьча боарамах лорий дарба ду больнице бадача унахошта.
Коронавирус долаш цIагIа дарба деш болча унахошта лорий новкъостал ду. Ялх амбулаторни ковид центр хьайийллай. Унахошца болх бергбола тоабаш а вIашагIъехкай.

Итта оператор чувоагIаш йола сихача новкъостала юкъарле я 122 номерах къахьегаш.

ТIоаршхой Рукъета яхачох, карарча хана хьалхара вакцина яьраш ва 98 677 саг, шоллагIа йола вакцина яьраш — 70 434 саг. Таханарча денна вакцина ераш цхьан дийнахьа 345 саг ва 100 000 саг хьаийцача (Россе гIолла-331) саг ва.

ДIахо министра белгалдир, республике хьачуений 111592 вакцинай комплект. ТIехьар тIа я езаш я 10-15 дийнахьа 12284 дозаш.

ГIалгIайче, кIимарса бетта 26 денга кхоачаш лазар кхийттараш 17 358 саг ва, царех 16 125 тоавеннав, веннар — 210.

Больнице бадараш 339 саг ва, царех 32 саг реанимаце ва.