Кагирхошта балха моттигаш Ӏалашъергья
08.11.2023 10:35
Кагирхой гӀулакхех йолча комитета болхлоша МагӀалбике дӀахьоча балха моттигех йолча ярмаркага гӀолла, шоашта болх лаха аьттув ба бахархой. Из хоам «Сердало» газетага бу цигарча къахьегамхоша. «МагӀалбикерча культуран цӀагӀа дӀахьоргья ярмарка сахьат даьлча дӀайолаенна, диъ даллалца. Ярмарко кхоачашдергда ши гӀулакх: кагирхошта балха моттигаш лохаргья, говзанчаш эшача предприятешта къахьегамхой Ӏалашбергба.
Цу моттигашка хургья, мах бала ца безаш, болх бе Ӏомавеш йола курсаш. Кагирхой гӀулакхех йолча комитетерча наха гӀо деш лелараш хургба цига, спикерий болх дӀахьош, моллагӀа долча хаттара жоп царгара ха йиш я. Коммерчески организацешта малагӀа болхлой эш, цар кхоачашде дезар малагӀа гӀулакх да хайташ йола фусамаш хьаяьй цига», - дийцар кагирхой гӀулакхех йолча комитете.
Хьалха «Сердало» газета дийцадар, иштта йола ярмарка Наьсаре хиннилга. Цу хана, болх бе моттигаш лехача 500 совгӀа кагирхоша дехараш дитадар.
