ГӀалгӀайчен доал деча даькъ тӀарча викало кхычарна юкъе белгалдувлача бера дог хьаьстар
МагӀалбикерча муниципальни кхален администраце кулгалхочо Къоастой Ӏаддал-Хьамида доккха дикахетар дир Мархенаькъан Далена «Дагалоаттамий корсам» яха болам дӀахьош, лаьрххӀа йола занятеш дӀаяхьара эшаш йола, цо бийха уда никъ оала гӀирс совгӀата бенна. Из йиӀиг могашал яйна я, могашал юха меттаоттаяра из ца хилча яргйоацаш яр, цар шоай таро яцар из эца.
«Аз, хоза хеташ, кхоачашдир цун дагалаьттар, цу тайпарча, малх санна къаьгача бера дикахетар де вӀалла а хала дац, аз иштта баркал оал из «Дагалоаттамий корсам» яха Ерригроссе болам вӀашагӀбелларашта, из бахьан долаш дег чура къамаьл хилар са Далеца», - аьлар Къоастой Ӏаддал-Хьамида «Сердало» газетага.
Бера гаргарча наха аьлар, из совгӀат цунна чӀоагӀа лоархӀаме да, аьнна. Уж тешаш ба, цу гӀирсо шоай бера могашал тоаергхиларах. Вай сага деш дола дикахетар дувцача хана, саг геттара гӀадваха хинна моттиг ювца ловш хул.
Къаьстта из моттиг яр Далеца нийсъеннар а- зӀамигача йиӀигаца, Керда шу хьатӀадоагӀаш дукха сатийса хинна совгӀат делар цунна дикача сага. Из дика хьагойт, цу моттиге яьккха хиннача лоацача видеосурто. Цо хьалхадоаккх вайна, цхьайолча хана дагадоацача хӀамах саг мел чӀоагӀа гӀадвода, боккха тоам мишта хул.
