Уж кашамаш укхаза хьахилар, Сибрера нах цӀабаьхкачул тӀехьагӀа. Уж къаьнагӀчарех дар, дукха ха яр тоаде дезаш дола. Цига дӀабахьа беза болх вӀашагӀбеллар, ГӀалгӀайчен Кулгалхочо «Софмар» дикача гӀулакхий ганза кулгалхочунца Гуцаранаькъан Микаилаца. Карарча шера тушола бетта уж тоаде доладир, хӀаьта йистедаьхар ардара бетта. Массехк бутт мара эшанзар уж, хоза кийчдаь, тоадаь, йистедаха. Йиъ оагӀорахьа керда коанаӀараш оттайир, гобаьккха карт йир, из ши эзар метр гаргга йӀаьха я. Наха хьатӀабоагӀаш аттагӀа хургдолаш, асфальт биллар, машенаш Ӏооттае моттиг а кийчйир. Цул совгӀа, дукха эргадаьккха хӀама да тахан цу кашамашка. Ламазаш ду моттиг кийчъяьй; цхьацца гӀирс ийцаб, цу кашамий коа эшаш хуле а аьнна; зикар де моттиг кийчъяьй, наькъаш Ӏодаьхкад. Шолже бахача наха уж тоадаь далар чӀоагӀа лоархӀаме да, цар юххьанца а, хоза хеташ, тӀаийцар «Сафмар» ганзо уж тоадеш хилар. ЦӀаькха белгалдоаккх, уж кашамаш тоаде доладаьдар карарча шера бӀаьсти, мехка кулгалхочо Махьмуд-Ӏаьлас «Сафмар» ганза кулгалхочунца Гуцаранаькъан Микаилаца баьча бартах. Цар яхачох, вай даьй дӀабехка боахка моттигаш дикача хьале хилийтар- юкъара культура хулийта хӀама да, цудухьа ГӀалгӀайчера кашамаш цхьоагӀонца леладе деза.