Хоржамаш деча моттигашка, болх кхехкаш ба
ДӀахьош да Россе президента хоржамаш, ГӀалгӀайчен хоржамий даькъ тӀа болх кхехкаш ба. Цу юкъе я №401 йола МагӀалбикера, Чахкенаькъан СаӀида цӀерагӀа №1 йола гимнази. Цу дакъ тӀа хоржамаш дӀадахьара лаьрххӀа оттабаь укх заман гӀирс а латт, эшаш мел йола техника а я, цо таро лу паччахьалкхен хоржамаш лакхача боарам тӀа дӀадахьа. Из иштта долга хайра «Сердало» газета корреспондентá.
ХьалхагӀа, цу хоржамашта кийчо еш, укхаза деррига балхаш дӀадихьадар. №401 йолча хоржамий даькъ тӀа кхадж тассара мел эшар долаш да, цу юкъе къайлагӀа кхадж тассара йола кабинкаш, бюллетенешта лаьрхӀа яьшкаш, даькъ тӀарча хоржамий комиссе доакъашхошта болх бе моттигаш. Къаьстта укхаза терко тӀайохийт кхерамзленна.
Кхадж тессача даькъ тӀа безаме, паргӀата болх дӀахьош ба, наха кхетаду хоржамаш дӀадахьар мел лоархӀаме да, цудухьа бехктокхаме болаш шоай декхар кхоачашду цар.
ХӀанз хоржамаш дӀахьу №1 йола МагӀалбика гимнази йовзаш я ший дикача истореца, Ӏадаташца. Укхаза болх беш ба балха говзал лакха йола хьехархой, шоашта ховш дар кагирхошта дӀалуш, къона ноахал кхедеш хьабоагӀа уж. Тахан царех дукхагӀбараш хоржамий комиссена юкъе ба.
