Наьсарерча «АйтиХаб» майдан тӏа киберкхерамзленах лекци йийшар
Гӏалгӏайчен кагирхой гӏулакхех йолча Комитета болхлочо Овсажанаькъан Мухьмада «Интернет бувзамашка киберкхерамзле» яхача темах лекци ешара болх вӏашагӏбеллар. Из дӏабихьар Наьсарен «АйтиХаб» майдан тӏа. Цига дакъа лоацаш вар Кагирхой хоамий кхерамзлен центра кулгалхо Пхьошанаькъан Илез.
«Керттера терко тӏаяхийтар цхьацца долча хаттарашта: хургболча програмисташта хезар шоаш гаьна а болаш куташ лелаеш нах хиларах, цар къоастадир царех мишта лоравала веза. Из къамаьл деча дакъа лоацаш бар МВД доакъашхой, цар дийцар онлайн-хьалашка лелабеча тийшача балхах»,- аьлар «Сердало» газетага Гӏалгӏайчен кагирхой Комитете.
Ер деррига дуне онлайн вахарга даларца дувзаденна нийслуш дола зуламаш юхатохара цу тайпара къамаьл эшаш да. Цар ӏомабу кагирхой таьрахьий хьал дикагӏа довза, шоай вахар лораде. Цу тайпара кхетам балара болх дӏахьош хилча, цо ӏомаву таьрахьий хьалаш сакхетам болаш леладе.
Тахан кагирхошта ха дезаш да кхерамзлен вахар мишта хила деза, иштта куташкал леладерашта, харц хоамашта духьалъотта.
