Из цIай долаш ГIалгIайчен 1,5 эзар таро йоацача дезалла новкъостал дергда. «Мехка сагIа» яха акци дIахьош я ГIалгIай Республика Кулгалхочо Келматанаькъан Махьмуд-Iаьлас тIадиллача декхарах, ГIалгIайче дегIайоалаяра Къаман фонда чотах.
Эшаш мел дола хьайбаш вай республика доазон тIа долаш да аьнна, хоам бир «Сердало» газетага республика кулгалхочун пресс-служба.

ДукхагIча даькъе, вай мехка кхедеш дола жа да ийцараш, ГIурбана лаьрхIа. Доккхий хьайбаш «Мехка сагIа» яхача фондо ийцад, цунах хьахиннача пайдах кегий хьайбаш юха хьаэцаргда, дIахо йодача хана юртбоахам дегIабоалабара. Хьайбай цхьа дакъа моттигерча юртбоахамаш леладерашкара ийцад.

Хоам бу, юртарча администрацешка а дийшача наьха юкъарленашка а таро йоацача наха лаьрхIа дола хьайбаш дIадекъаргда, цар шоаш ГIурба дергдолаш. Цу гIулакха новкъостал де кийча ба вай мехкара волонтераш.

ДIа мел хьош бола болх эпидемиологически кхерамзле лораеш бергба.

Белгалдоаккх, цу тайпара вай таро йоацача наха долча новкъостала аьнна, деш дола сагIа диазлагIа деш хилар, из де таро хул, ГIалгIай Республика Кулгалхочо тIадиллача декхарах, ГIалгIайче дегIайолаяра Къаман фондера ахчанца новкъостал деш хиларах.

Цул совгIа, вай юртбоахама министерство вIашагIйохкаргъя доккхий а кегий а хьайбаш маьхалдахара йола ярмаркаш, уж дIахьоргъя 17-20 июле ГIалгIайчен районашка, шахьарашка.

Цхьа бIаь совгIа ахархой (фермерий) боахамаш хургда цига дакъалоацаш. Цар дохка оттадергда ГIурбана доаде йиш йола ши бIаь доккхий хьайбаш, ши эзар кегий хьайбаш.