Магӏалбикерча Орцханаькъан цӏерахча ураме асфальт ӏобуллаш боахк болхлой
Магӏалбикерча Орцханаькъан цӏерах болча ураме керда асфальт ӏобуллаш боахк тахан болхлой. Юххьанца къоастаяьча хана, кийча хургба никъ, хьагучох. Эггара хьалха кӏийле тоаеш, жагӏа тоссаш, никъ шаьрбеш баьхкар цига, цул тӏехьагӏа асфальт ӏобуллаш бола болх дӏаболабир.
«205 метрага кхоачаш бӏаьха, 5,5 метр шера ба никъ. Керда асфальт уллача наькъ тӏагӏолла дӏа-хьа аха дуккха аттагӏа хургда бахархошта, иштта машинашта. «Вахарера моттигаш тоаярах йолча» къаман проектага гӏолла деш да уж хувцамаш. Шахьарерча наькъий хьал боаггӏача боараме меттаоттадар лоархӏамеча декхарех да тахан», - йоах «Сердалога» Магӏалбикерча администрацера бенача хоамо.
Йоккха юкъ ялале, паргӏатта дӏа-хьа ваха аьттув болаш хургба Орханаькъан цӏерах бола урам, хӏаьта цу гӏулакхо меттадоаладергда кхерамзлен хьал а.
