«Росси» яхача кхетаче-хьажаре болх беш ба ГӀалгӀайчен гойтам
04.11.2023 16:41
Москве, халкъа цхьоагӀон ди долаш, ВДНХ хьадийллар цӀаккха а ца хиннача тайпара доккха «Росси» яха Халкъашта юкъера кхетаче-хьажар, цига вай мехка карагӀдоалар гойташ хургда. Россе кхыйолча дукхача моттигашта нийса ГӀалгӀайче а я цига дакъа лоацаш. Вай мехка толамаш дайзар, Россе экономически дегӀаахара министра заместитель волча Назаров Сергейна.
«Вай ГӀалгӀайче дика йовзаш я, хьаьша тӀаэца кийча хиларца; ший истореца, ший тайпарча культураца, Ӏадаташца цӀи хеза хиларах. Вай гойтам ба тӀехьарча шерашка республикан экономиканна, культуранна, юртбоахама, промышленноста, гӀишлон даькъ тӀа карагIдаьннараш дувцаш, иштта кхы дуккхадараш а гойташ. Из тхона лоархӀаме да, цо таро хулийт ГӀалгӀайчен карагӀдоалар, цун Ӏалама хозле кхычарца екъа. Тхо хьож, вай республика, исторе мах бола тӀехьале хиларал совгӀа, таханарча ханара дегӀабоагӀаш бола мохк хилар дӀагойта», - аьлар кхетаче-хьажар хьаделлаш ГӀалгӀайчен кулгалхочо Келаматанаькъан Махьмуд-Ӏаьлас, цу йоккхача проекта юкъе ГӀалгӀайче дакъа лоацаш хиларах дувцаш.
«Росси» яха гойтам дӀахьоргба, 2024 шера бекарга бетта 12-ча денга кхаччалца. ХьатӀадоагӀача кӀира укхаза хӀара российски моттига хетадаьча денгара дӀайолалургья безам тӀабодаш йола кхетаченаш. ГӀалгӀайчен ди хургда, оагӀой бетта 8-ча дийнахьа.
