«Дошо гӏала» яхача Xӏӏ кинофестивале дакъа лаца 100 совгӏа дехар чуденнад
Xӏӏ «Дошо гӏала» яха Халкъашта юкъера кинофестиваль ший болх дӏаболабе кийчо еш я. 100 совгӏа саг ва, дакъа лаца безам болаш, дехар чуденнараш. Ардара бетта 10-гӏа ди кхачалехь, сихбала беза дакъа лаца ловраш. Тӏабоагӏача бетта 25-ча денгара 28-ча денга кхаччалца дӏахьоргба вай республике фестивала боккха болх. Цу гӏулакха хьалхаэттараш ба мехкарча культуран гӏулакхех йолча Министерствон, Россе кинематографистий Союза болхлой. Кхетаченна тӏахьожаш яр республикерча кинематографистий Союза, театра, кинон, кердадарий моттига кулгалхо Дзортанаькъан Мадина я.
«Цхьайтта шера болх дӏахьош «Дошо гӏала» яха фестиваль Даькъастен кинематографически оагӏонца лоархӏаме моттиг дӏалаьца я. Шоай балхаш боккхача говзанчашта гойта, шоаш дӏабовзийта аьттув ба дикка гаьнабаьннача начӏал дарий санна, къонача, хӏетта къахьега болалуш болча режиссёрий. Белгалде деза, фестивала хӏама хӏара шера дикка шерлуш латтилга. Яхьашка гойта шоай балхаш дайтадар БРИКС, СНГ мехкашкарча режиссёраша, иштта цу юкъе яр Китай, Инди, Иран, Бразили, Казахстан, Узбекистан, Таджикистан, Азербайджан. Доакъашхошта юкъе бар Аргентинера, Кубера, Нигерера, кхыйолча паччахьалкхенашкара автораш. Яхьашка дакъа лоацаш тайп-тайпарча мехкашкара нах хиларо хьагойт «Дошо гӏала» яхача фестивала хӏама дикка даьржалга», - «Сердало» газетага тахан из хоам кхаьчар культурани туризмаи гӏулакхех йолча министерствера.
Xӏӏ-ча кинофестивала яхьий программа ийс оагӏонах латташ я. Толашагӏа дола полнометражни, короткометражни оала ловзара кинош, документальни балхаш, мультфильмаш къоастадергда цига, иштта дикагӏа бола режиссёраш, маӏача наьха, кхалнаьха йовхьамаш ловзаеш белгалбаьннараш къоастабергба. Дикка терко ергья моттигерча кинематографа. Дикагӏа дола гӏалгӏай, Даькъастен кино яха оагӏув ба цу юкъе. Кинокхетаче дакъа лаьца, шоаш дӏабовзийта аьттув ба Россерча авторий санна доазол арахьарча говзанчий а.
Моллагӏа бола болх 2023-ча шерал хьалхагӏа вӏашагӏабелла хила йиш яц, «Дошо гӏала» яхача кинофестивале эггара хьалха гойташ хила беза. Укх шера къаьстта терко ергья денал, майрал гойташ тӏема моттигашка белгалбаьннарех долча киношта, цу юкъе да Сийлахь-боккхача Даьймехка тӏемах дараш, иштта таханара ха юкъелаьцараш. Фестивале котало яьккхачун мехка истореца, культураца лоархӏаме йола къаьнарча гӏалгӏай гӏала хьисапе дошо беса Гран-при бӏалгӏилг лургья.
