Гӏалгӏайчен заводе тӏахьожам лоаттабеча оагӏоно кхоачамбоацараш гучадаьхар
Илдарха-Гӏалан прокуратуро «АТМ» ООО йӏовхал лоаттаю радиатораш еча заводе кхоачамбоацараш гучадаьхар, яхаш, дийцар «Сердало» газетага ГӏР тӏахьожама боахаме.
«Цу балха даькъ тӏа гучадаьлар 2026 шера наджгоанцхой бетта доагӏаш дола алапи 2026 шера тушола бетта мара болхлошта дӏаденна цахилар. Цул совгӏа, электротехнически боаца болх а профессеш а чӏоагӏъяьяц, иштта болхлошта хьалхадаьккхадац лаьрххӏа лорабалара ахчаш доагӏаш хилар, балха моттигашка профессиональни кхерам бола моттигаш хьалхайоахаш болхлошца кхетаченаш дӏахьош яц.
Керттерча кулгалхочо балха моттиге лоралуш хилара дола дешар дийшадий а хьежабац, болхлой шоай ханнахьа лорашка чакхбалара болх а лелабац, сертификаци йоаца лоравалар гӏирсаш деннад болхлошта, балха моттиге хьалхара хьехам бе безаш боацача наьха профессеш малагӏаш хила еза гойташ дола каьхат дац», - йоах прокуратуран хоамо.
Гучадаьхача кхоачамбоацарашца гуш хилар из моттиг цӏи ялара кхерамзлен ӏалашо йоацаш болх беш хилар а.
Цу тайпара итт гӏулакх кийчдир завода кулгалхочун, юридически болхлочун духьала шахьара прокурора.
Прокурора акташ дӏайохьийтаргья Илдарха-Гӏаланна, Шолженна, Жӏайрахьа кхаленна, ГӏР гӏолла йолча Росссе МЧС ГУ тӏахьожама болх лелабеча отделе, иштта ГР Паччахьалкхен къахьегама инспекце. Цунца цхьана керттера кулгалхо декхарийла оттаваьв законо дӏадеххача беса кхоачамбоацараш юстардаха.
