Из дийцар юртбоахама министерстве дIайихьача совещане, цунна чуйоагIача предприятей кулгалхошца из дIайихьар республика юртбоахама, кхачана министра Гаьгенаькъан Мухьмада.

Предприяте фу а, удобрени а, доагама материалаш а хургдолаш Iалашо яра аьнна оттадаь, керттера хаттараш дар, уж дийцар юртбоахама отраслера къахьегамхой вIашагIкхийттача.

Цига иштта дийцар, тIехьа хьатIайоала ги дуаргаш, хьажкIаш, коартол чуэцарах, иштта «Зерно» ФГИС балхах лаьца дийцар Мураданаькъан Марема.

Ги дувцаш, цо белгалдир «ХIанз чуйийцача ялата ги бактерешта а зуламхошта эшар да. Цудухьа уж мелад хоам беш, ялат чуийцачул тIехьагIа каьхат дIа-юха дохьийт оаха. Цо таро хулийт, къаьстта малагIча ялата малагIа молхаш тоха еза хара.

Из доацаш а Марема белгалдир, укх тайпара совещанеш ГIалгIай Республике гIолла Россельхозцентра ларда тIа, каст-каста дIахьош хила еза аьнна. ТIаккха хьабеча балха сихал а дикал а тоалургья.

ГIалгIайчен агропромышленни боахам дегIабоалабара, гуйрийнара ялат дIадера йолча кампане доккха дакъа дIалоац, хIана аьлча, республике ка бола ялата культураш дукхагIа я. Цудухьа ГУПий кулгалхой тIахьийхар кхашкара балхаш лакхача боарам тIа дIадахьара.

«Iана кIала дувш дола ялат дIадер — из лоархIаме мероприяти я. Дукха болх ба бе безар. Из болх дIаболабе лерхI, моажола бетта 25-ча дийнахьа. Со тешаш ва, ха оттам дика хургхиларах», — аьлар юртбоахама министра.