Даькъастанерча кагирхошта юкъера терроризма духьалара болх чӏоагӏбеш я НАК
Москве дӏайихьар Къаман терроризма духьаларча комитета кхетаче, Россе ФСБ кулгалхочунга Бортников Александрага хьалхале йолаш. Доакъашхоша дийцар Даькъастен федеральни куран даькъ тӏарча боараме, кагирхошта юкъера терроризм юхатохара болх чӏоагӏбарах. Комитета балха юкъе дакъа лоацаш вар Гӏалгӏай Республикан Кулгалхо, яхаш, дийцар Мехкадаь зарбан болх лелабераша.
Цо яхачох, керттера декхар да, кхувш йоагӏа тӏехье терроризма юкъе цаялийтар.
«Кагирхой ӏехабара дика лелаю Интернет, вахара бувзамаш, сиха ахча даккхара наькъаш лохаргда а оал, уж хьож фуннагӏа даь а кагирхой ӏехабе, цу юкъебаха», - аьлар Келаматанаькъан Махьмуд-Ӏаьлас.
Кхетачене таьрахьий масал доаладир. Ер шу дӏадоладелча денз СКФО гӏолла юхатехад 33 терроризма зулам. Теракташ кийчъярах, уж дӏаяхьара ахчанца новкъостал дарах, терроризма никъ бакъбеш бола болх лелабарах 260 саг лаьцав. Царех дукхагӏбараш кагирхой, кхувш боагӏараш ба.
«Цу таьрахьо хьагойт, мел ира латт из хьал, хӏана бе беза хӏара сагаца хьехамашца бувззабенна болх», - аьлар республикан кулгалхочо.
Керттера бехктокхам, цо яхачох, доал деча даькъа болхлошта ӏотӏабуж. Къаьсттача моттигашка теркалде деза цу оагӏорахьа хувцалуш дола кагирхой хьал, цхьана бувзам лелабе беза даьшца, ӏаьдала болхлошца, бокъонаш лораерашца, юкъарлон организацешца.
«Лоархӏаме да, хьехама болх дӏабихьабар аьнна кхоачам ца беш, ший ханнахьа из дош чакхцадалийтара моттигашта терко лоаттаеш хилар», - аьлар Гӏалгӏайчен Кулгалхочо.
Цо иштта белгалбир хьехархой, балха говзалаш йола нах, цар кагирхошца шоаш деча къамаьлаца дӏакхетабе беза уж терроризма наькъах хьадоалача зуламах.
«Кагирхошта довзаш хила деза шоаш юкъеозара цар леладу гӏулакхаш, цул тӏехьагӏа шоаш мичахьа кхоачаргба», - аьлар цо.
Кхетаче чакхйоалаш, тӏехьара тӏа хьехама балхах пайда эцаргбола оагӏонаш техкар. Республикан Кулгалхочо доал дара даькъ тӏарча хьакимашта тӏадиллар, из болх чӏоагӏбар, цо къаьстта терко тӏаяхийтар цу воча гӏозара юкъе нийсбала тарлуш бола кагирхой юхатохара массане цхьана къахьега дезаш хилара.
