Ший болх чакхбаьккхар ворхӏлагӏча кхайкаралах болча Халкъа Гулламо
Ворхӏлагӏча кхайкаралах болча Халкъа Гулламо ший болх чакхбоаккхаш, кхетаче хилар республике. Халкъа Гуллама спикер волча Тӏумхой Мухьмада кулгал деш дӏадихьар вӏашагӏкхетар. Цига гулбеннабар республикера бехктокхаме нах: федеральни инспектор Гудов Залим, тӏахьожама-дагардара палата хьалха латта Гаьгенаькъан Хаваж, сага бокъонех вола викал Цӏечой Ибрахӏим, республикерча прокурора гӏонча Гӏамарзанаькъан Лина.
«Дӏайихьача кхетаче депутаташа тӏаийцар Гӏалгӏай мехка паччахьалкхен совгӏаташцара, машинех телача йоалах, йоалацара болх патентни оагӏонца дӏабахьара, моттигий доалахьарча хӏамах йолча йоала массехк бокъо, иштта «Мехкарча Тӏахьожама–счётни палата штатни оагӏонцара» Халкъа Гуллама соцам. Халкъа Гуллама кулгал деча Тӏумхой Мухьмада баркал аьлар депутаташта, Халкъа Гуллама аппарата цхьана къахьегаш дӏабихьача балхах, кхоачашдаьрех. Парламента аппарата доакъашхошка къамаьл деш, Тӏумхой Мухьмада белгалдир доакъашхой шоай декхараш бехктокхаме, бокъоно дӏадеххача тайпара кхоачашдеш хиннилга», - дийцар «Сердалога» цу моттигера.
Дӏахо, шоай гӏулакхе белгалбаьннача Халкъа Гуллама аппарата доакъашхошта, совгӏаташ делар, боаггӏача боараме къахьегарах.
