ГӀалгӀайчен халкъа фронта хьадийхар «Коталон Хьу» аьнна йоазув даь моттиг юха меттаоттаяр
Сийлахь-боккхача Даьймехка тӀема турпалхой сийна, МагӀалбика доазон тӀа даь «Коталон Хьу» яха дагалоаттама йоазув ийрчадаьннад, го йиш йоацаш. Цунна терко йир ГӀалгӀайчен халкъа фронто, шахьара администрацегара из меттаоттадар хьа а дийхар.
«Сийлен улг тоа ца дича даргдоацача даьннад. Оаха каьхат яздаьдар МагӀалбик-Шахьара администраце, цу гӀулакха уж оарцагӀбалар дехаш, цул совгӀа, цунна гонахьара доазув лостам бе безаш хилар а юкъелоацаш», - аьлар «Сердало» газетага республикан халкъа фронта викалаша. МагӀалбике «Коталон Хьу» яха йоазув даьдар, 2015-ча шера бекарга бетта, лаьрххӀа дӀаегӀаяр цига кӀайча миха, хьеха гаьнаш.
Массехк шу даьлча, Сийлахь-боккхача Даьймехка тӀем тӀа Котало яьккха 75 шу дузаш, цига, моастагӀа эшаваьча, советски салтий, эпсарий сийна дагалоаттама улг а дегӀадар.
