Наьсаре, ший 245 шу дизарга, дикка эргайоалаш латт
Шахьара моттигашка кулг тохаш, хувцамаш деш къахьегаш ба тахан. Мэр волча Оздой Руслана тӏадилла, дӏахьош болх ба из. Шахьарерча керттерча урамий куц хоза, боагӏача боараме меттаоттадаь хилар лоархӏаме да тахан.
«Мах беча моттигий дай гонахьарча доазон тӏа асфальт ӏобуллаш, нах дехьабувлача моттигашка кулг тохаш, хувцамаш деш кхесташ ба тахан. Осканаькъан, Базорканаькъан цӏераш лелаеча урамашка къахьегаш боахк карарча хана. Эггара дукхагӏа машинаш, адам лела моттигаш я уж, цунга хьежжа боаггӏача боараме куц эргадаьккха хила еза», - дийцар «Сердалога» шахьара мэре болхлоша.
Керттерча урамашка санна кхыйолча моттигашка а хургда хувцамаш. Шахьара хӏара миӏинге цӏенагӏа, хозагӏа, паргӏатагӏа хилийта гӏерташ дӏахьош болх ба из. Къаьстта лоархӏаме да из тахан, шахьара 245 шу дузача хана.
