МагIалбика кхале хьалъеш латта ишкол 320 дешархочо лаьрхIа я
28.12.2023 12:05
МагIалбика кхалерча Южни оалача юрта хьалъеш латтача ишколо наIараш хьаелларгья, 320 бера хьалха. «Дешар» яхача къаман проектага гIолла дIахьош беркате болх ба из вай мехка. МагIалбикерча хьакимаша яхачох, кердача ишколо чIоагIа паргIато лургья тIехйиза латтача къаьначарна. Юртара арабовла ца безаш, боаггIача боараме шоай дешар дIадахьа аьттув лургба берашта йоккхача ишколо.
«Таханарча дийнахьа Южне болх беш 120 бера лаьрхIа, 1985-ча шера хьалъяь цхьа ишкол я. Бакъда ишколе дешараш 266 бер да шин сменах.
Керда ишкол цу моттиге эшаш йола дикка ха я», - дийцар тха газетага МагIалбика кхален дешара тIахьожам беча моттига оагIонна кулгал деча Бохтаранаькъан Аминас. Таханарча хано дIадеххача тайпара хьалъеш латтача ишколе хургья лаборатори, кхетачеш дIакхухьа зал, кхача кийчбеш, буаш йола моттигаш, иштта кхыдараш а. Хоза тоадаь хургда гонахьара ков а.
Физкультура дIакхахьа доккха доазув къоастадергда коа. Укх шера бIаьстан хьалхарча бетта дIаболабир из болх. Таханарча дийнахьа 30% кхоачаш, болх йистебаьннаб. Лакхера тхов нийсбеш, ток чуюллаш, чура пенаш хьоахаш боахк болхлой.
