ГӀалгӀайчен водителашта хьалхадаьккхар; вайцига ша а, лоа а, догӀа а хургда, аьнна
ЦӀаьхха, хувцабеннаб хаоттам, наькъашка ша баь а, лоа, догӀа делхаш а хургйолга хьалхадаьккхар ГӀалгӀайчен водителашта, яхаш, хоам бу «Сердало» газетага ГӀалгӀай Республике гӀолла йолча МВД.
«ГӀалгӀай Республике гӀолла йолча МВД Госавтоинспекце, водителий теркам тӀаоз, укх деношка машенаш сиха ца лехкаш, лоралуш хила безара. Машен соцае езаш нийслу, цудухьа цхьайолча моттигашка е гӀашлой дехьабувлача кхаьчача, машен лаллара боарам лаьгӀбе безаргба.
Хаоттам дика боацача хана, гӀашлой наькъа нийса дехьабалац, из дика бӀаргагуш цахиларах, из дагалоаттадеш хила веза водитель», - аьлар наькъашта тӀахьожам лоаттабеча полице болхлоша.
ГӀулакх довзараша мехка латташ дола ДТП хьал дувцаш, кхераме таьрахьаш доаладу, цар цӀаькха а хьагойт Ӏан заман шелал хьаоттарах; водителаш, гӀашлой лорабала безилга, новкъа лелалара бокъонаша дӀадехараш кхоачашде дезилга. Цо таро хулийтаргья могашал а вахар а лораде, унзарча хӀамах кӀалхарвала.
