ГӀалгӀай паччахьалкхен бӀаь шу дизарга, дикагӀа дола илли яздара яхь дӀакхайкаяьй
ГӀалгӀайчен культуран министерствос, гӀалгӀай паччахьалкхен 100 шу дузаш, дикагӀа долча илле республикански яхь дӀакхайкаяьй. Из яхь вӀашагӀъеллар я Хамхой А. цӀерагӀа Паччахьалкхен филармони, цига дакъа лаца йиш йолаш ва моллагӀа.
«Кхелахой хургба балха говзал лакха йолча тоабах латташ, цар хоржаргда цу исторически денна доагӀаш дола дикагӀа дола илли.
Цига дакъа лаца безам бараш дехараш хьачудала йиш йолаш ба, яхь хӀанз дӀайолаеннай, из хургья карарча шера бекарга бетта 22-ча денга кхаччалца. Дехарашта чубоагӀаш хила беза бӀарчча иллей чулоацам, цу юкъе дешаш а мукъам а цхьана шоайла дувшаш хургдолаш.
Яхьа кхелахой болх йистебаргба маьтсела бетта цхьоалагӀча дийнахьа, хӀаьта маьтсела бетта 10-ча дийнахьа котбаьннараш белгалбергба. Хьалхара моттиг яьккхачун 100 эзар сом ахча лургда, шоллагӀа, кхоалагӀа моттиг яьккхарашта 70, 50 эзар сом лургда», - аьлар «Сердало» газетага моттигерча культуран зарбан болх лелабераша.
