Аргӏанара гуманитарни мухь бахьийтар Гӏалгӏайчера СВО даькъ тӏа
Гӏалгӏайчен Халкъа фронто, «Россе тӏема гӏулакха ветеранаш» яхача Россе юкъарлоно, Гӏалгӏай моттигерча даькъаца цхьана шоай декхар кхоачашдир, аргӏанара гуманитарни мухь бохьийташ «Аьрзи» батальона бӏухошта, Лаьрххӏа йола операци дӏахьоча даькъ тӏа. Из мухь вӏашагӏбеллар Гӏалгӏай мехка, «Халкъа фронт. Деррига а Коталон!» яхача гӏонна чубоагӏаш. Цига дика дакъа лоацаш хилар республикан студенташ, колледжий хьехархой.
«Генератораш, даар, молхаш - из деррига вахаре ца хилча даргдоацар да. Бакъда цар лаьрххӏа дийхадар цхьа хӏама: машинашта, генераторашта чудувтта доагор леладара бола пед. Из эца раьза хилар меценат Йовлой Улан. Чӏоагӏача аьшках баь, 5 600 литр чуйодаш пед бар, доагорца царна кхоачам хургболаш, декхараш шоай ханнахьа кхоачашдергдолаш из хаттар кхоачашдир. Шоашкара дакъа лаьцар Гӏалгӏайчен колледжаша, ца талхаш дукха лелабе йиш йола кхача, молхаш яхьийтар цар. Гӏалгӏайчен унахцӏенон профсоюза болхлой республикански организаце, вай кагийча наха генератораш яхьийтар», - аьлар «Сердало» газетага Гӏалгӏайчен Халкъа фронте.
Цунца цхьана «Халкъа фронт. Деррига Коталон!» яха мухь дӏахохьош ба. Гӏалгӏайчен бахархоша, берригача мехкаца хьаллоац российски бӏухой, тахан вай мохк, вай кхоане лораеш латтараш. Россе бахархой цхьоагӏо - коталон кӏийле.
