Цхьан дезале кхолха, кхаь дезале шола даь бераш хилар дӀабахача бетта
05.09.2023 09:35
Дика кхаъ ба хӀетта Ӏодаьча гӀо эшача зӀамигача берашка хьожача моттигера вайга кхаьчар. ДӀабахача бетта 14-ча денгара дӀадоладенна из бутт дӀабовлцца йолча хана, 276 бер малхадаьлар вай мехка, Даьла къахетамца. Кхаь цӀагӀа шола даь бераш хиннад, хӀаьта цхьан фусаманна кхо бер деннад Дала.
«ДӀабахача бетта малхадаьннача 276 бера юкъера 127 йиӀигаш я, кӀаьнкаш — 149. Эггара доккхагӀа дола бер 4, 920 граммага кхоачаш дар», — йоах цигара бенача хоамо.
Могаш, иразе долаш, хьалкхувлда вай бераш! Вахаре эггара боккхагӀа, хозагӀа бола кхаъ ба бер малхадалар!
