СВО бейнача бӏухоех бола дагалоаттам чӏоагӏбир, Илдарха-Гӏалий тӏарча №2 йолча ишколе
Илдарха-Гӏалий тӏара №2 йола юкъера ишкол Россе Турпалхочун Хамхой Адама цӏи лелаеш я. Цига лаьрххӏа хьайийллар шиъ «Турпалхочун парта». Уж хетаяьй цига деша баьгӏача Йовлой Саӏид-Мухьмада, Янданаькъан Мухьмада. Уж бейра лаьрххӏача тӏема операце даькъ тӏа, шоай декхар дизза кхоачашдеш денал гойташ. Цига дакъа лоацаш бар цар дезал, гаргара нах. Иштта цига вар Гӏалгӏайче гӏолла йолча Россе МВД чуйоагӏача Юкъарлон совета секретарь Амаканаькъан Хьусен, «Даьхен лорабой» ганза моттигерча филиала вахара оагӏон болх лелабераш, шахьара администраце болхлой, тӏема ветеранаш, хьехархой, дешархой.
«Выпускникий цӏераш тӏайола «Турпалхой парташ» ишкола исторе цхьа дакъа хилар, цо хьагойт шоай Даьхе бахьан са дӏаденнача Турпалхой денал, иштта цо масал лу кхувш йоагӏача тӏехьенна, мехка турпала тӏехьале лораяра уж тӏахьех», - аьлар «Сердало» газетага Гӏалгӏайчен МВД зарбан болх лелабераша. Янданаькъан Мухьмада сийна «Турпалхочун парта» хьаделла бокъо елар цун воӏа Янданаькъан Руслана, цо къамаьл дир гулбеннарашта хьалхашка. Мухьмад ваьвар 2000 шера, из ишкола яьккхар цо ийслагӏча классага кхаччалца. Ший лоӏам болаш вахар из тӏем тӏа. Денал гойтарах, цунна дийна волча хана елар «Майралах» яха майдилг, иштта 1-ча дозала Хьарак. Мухьмад велар ший тӏема декхар кхоачашдеш, Донецки Халкъа Республикан доазон тӏа, валарца Денала орден елар цунна.
Шоллагӏа парта хьайийллар Йовлой Саӏид-Мухьмада. Цо ишкол яьккхачул тӏехьагӏа дика чакхъяьккхар Новочеркасски паччахьалкхен технически университет, из а цул тӏехьагӏа, ше раьза волаш, тӏем тӏа вахар. Из велар 2024 шера Луганска Халкъа Республике, цо цига тӏеххьарча денга кхаччалца ший тӏема декхар кхоачашдир. Цун цӏагӏа йисар фусам-нана, диъ бер. Денал, майрал гойтарах цунна елар Денала орден.
