ГIалгIайчен депутат хьежар, МагIалбика хоржамий даькъ тIа кийчо яьйий
ГIалгIайчен Халкъа Гуллама депутат, юкъарлонца бувзам лелабеча, дин гIулакхех йолча комитета доакъашхо Кузнецов Александр ваха хилар, МагIалбике хоржамашта кийчо мишта яьй хьажа. Из хьежар, Россе Президент хоржаш, нах кхадж тасса хьаухаргболча даькъ тIа деррига хила дезача тайпара кийчо яь дий.
«Кузнецов Александр хилар МагIалбикерча №3 йолча ишкола даькъ тIарча кхадж тасса кийчъяьча моттиге. №406 йолча хоржамий даькъ тIарча кулгалхочунца Iалбаканаькъан Аьсетаца из массанахьа хьежар: хоамий стендашка, цIагIа багIаш, хьабахка могаш боацача наха кхадж тасса дIаяхьа еза яьшкаш кийча йий, эшар фуд», - аьлар «Сердало» газетага МагIалбика шахьара администраце зарбан болх лелабераша.
Халкъа депутата иштта кхетаче хилар, МагIалбик-Шахьара доазон тIарча хоржамий комиссе кулгалхочунца КIориганаькъан Мухьмадаца. Цо дийцар цу лоархIамеча политически денга кийчо мишта яьй.
