Берий лораша ноаношта могаду накха хьокхар
Берий лораша яхачох, къаьстта хьалхарча ах шера, бера накха хьокхар лоархӀаме да, наьна а бера а унахцӀенонна. Ховш да, накха хьекха бераш кӀезигагӀа цамогаш хул, хӀана аьлча лазара уж дикагӀа духьалъаотталуш да.
Бера накха хьокхар мел лоархӀаме да дийцар онлайн-семинаре республикерча бераш деча керттерча моттига берий лора Овшанаькъан Фатимас.
«Хьамсара ноаной, нагахьа санна шоашта бера накха хьокха ца моге, шура лакъаргйоаца хӀама де. КӀезига ха яьлча, бер хьадаьчул тӀехьагӀа хулаш йола цхьацца халонаш дӀаяьлча, шун таро хургья из мах баь варгвоаца кхача бера дӀалуш хила.
Цхьаккха а хӀамах хувцаргьяц наьна шура. Тахан вайна кхы а дикка мах бе хац цу Ӏалама совгӀата. Наьна шура – из духхьал шура хинна Ӏац, цунах белок, хий, микроэлементаш, хьоанал, кхыбола кхачан кхоачам боалл. Цудухьа лоархӀаме да, хьахила дезача бера накха хьокха йиш хургйола оагӀув лорабеш шу хилар», - аьлар Овшанаькъан Фатимас.
