«Хьалхарчар Болама» доакъашхоша марха дастийтар водителашка
«Хьалхарчар Болам» яха хӀарман болх дӀахьош болча болхлоша, водителий дог гӀоздаьккхар. Цар наькъ тӀа дӀадийкъар, «Дика хӀама де» яхача Россе юкъарча проекта чудоагӀаш, даар чудола тӀормигаш. Из цар дувзаду, Рамадан бутт хиларца, яхаш, дийцар «Сердало» газетага «хьалхарчар» керттерча штаба зарбан болх лелабераша.
«Из дика гӀулакх дӀадахьара кийча хилар Илдарха-ГӀалан №5 йолча ишкола дешархой, царна тӀахьожаш вар цар хьехамча. Дешархоша шоаш кийчдаьдар мерза даар, хӀаьта кӀаьнкаш керттерча урам тӀа из дӀадекъаш бар, новкъа машинашца боагӀача водителашта, иштта машина чу багӀача наха, уж марха даста ха йоалача хана наькъа болхаш нийсбаларах», - аьлар «Хьалхарчар Болам» яхача цхьанкхетара говзанчас Налганаькъан Рамзана.
Белгалдаккха деза, хӀара шера ГӀалгӀай мехка «Рамадан - дикача гӀулакхий бутт» яхача уйланца сагӀа луш хилар, иштта таро йоацараш, дукха дезал бараш хьаллоацаш, кхы а дукха дика гӀулакхаш деш хилар.
