Музаев Анзора белгалдир, экзаменаш дIаялара болх хьалххе а дIабихьа хиларо таро хилийтар цу хьаькъехьа лаьрххIа дола толамаш даха, аьнна. Цо яхачох тIахьожамбара ведомстваш паччахьалкхен цаӏйола экзамен (ЕГЭ) дIаялара хьал довзаш Россе субъекташка гIолла хьожаш ба.
"ГIалгIай Республике цу хьакъехьа оаха лаьрххIа терко лоаттаю. Ерригача республика школашка дешара дикал лакхъяра тIаберзабаь ба болх, кхыметтел эггара гаьнагIарча моттигашка ядача школашка а, цун боарам таханарча дено дIадеххача бесса хургболаш, даьшта-ноаношта, иштта деша дагIача берашта дезаш дола хьашт кхоачаш хургдолаш. Вайна дика ховш да бераш дика хьийха кийчдаьча моттиге экзаменаш а дика дIачакхйоал, — аьлар Рособрнадзора кулгалхочо.
Махьмуд-Iаьлас яхачох, дешара боарам, моллагIа дешар из дале а, лакхбе безаш хилар даим а теркаме хила деза. Таханарча денна мехка хувцамаш дIахьош да: хьалхарча аргIах дешара кхуврчашка болх беш бола нах балха говзал лакхъяь хила беза, иштта дешара кхуврчашка болх беш бола хьехархой тайп-тайпарча оагIорахьара шоай балха кийчо яь хила беза. Деша хьаэцача хана теркалдергда технически специальность хилара дош.
ДIадахача шера экзаменаш дIалуш кхоачамбоацараш юкъе нийслургдоацаш оаха, Россе просвещене Министерстваца дагадаьнна, Паччахьалкхен экзаменационни комиссе кулгалхо хержар дешара кхуврча министр а ца хоржаш е тIахьожам лоаттабеш вола вице-премьер а ца хоржаш, къаьстта сенатор БIархой Мухарбик. Цудухьа толам а цунга хьежжа хилар: хьалхагIа дика толамаш даьхад аьнна мехка дикагIа йолча дешара моттигашка деша ийтта студенташ хьалхарча шера дешара юхабаьлар. Уж а бар дукха — хьал во дар, хIаьта хIанз дешабагIараш боккъонца шоай моттиг дIалоацаш ба, — аьлар республика кулгалхочо.
Дешареи Iилмани кхуврча министра Бокова Аьсета 2021-ча шера экзаменаш дIаялара этта хьал довзийтар. Хоам бу: паччахьалкхен итогови аттестаци дешара программах юкъерча дешарах дIахьоргъя ЕГЭ оалача боарамах май бетта 3I-ча дийнахьа денз июль бетта 2-ча дийнахьа кхаччалца йолча юкъа. Экзаменаш дIахьоргъя 8 моттиге (ППЭ), иштта паччахьалкхен выпускной экзамена формах (ГВЭ), май бетта 25-ча дийнахьа денз июнь бетта I0-ча дийнахьа кхаччалца йолча юкъа, ППЭ 3 пункте, цIагIара болх а болаш.
Моттигерча информационни система (РИС) ЕГЭ керттера дакъа дIахьоча доакъашхой деррига даннеш да.
2021 шера экзаменаш дIаяхьара яьча кийчонна хьалххе тохкам беш лаьрхIад интернете гIолла экзамена материалаш хилийта. Иштта мел эшачунца Iалашо е лаьрхIад берашта, цу юкъе да экзамен дIалуш йола моттиг сийрда хилар, цIена а эшача антисептикаца кулгаш цIендар а еш йола кийчо а я цу юкъе.
Бокова Аьсета белгалдир, Россе гIолла баьча балхашка хьежача 28-ча моттигера 9-ча моттиге вай республика кхаьчалга, хIаьта 2017 шера 84-ча моттиге мара яцар из.
Укх тIехьарча кхаь шера 23-негара 4-нега кхаччалца лаьгIденнад бокъонах доацаш экзаменаш дIалуш хилар.
Музаев Анзора белгалдир, дешара болх ший боарамах дIахьош хилар.
— Цхьабакъда, цу тIехьа иштта сиха ма хетта толамаш доахалац, — аьлар цо. Хьалхарча даькъе школашца бе беза болх белгалбаккха беза, цу тайпара школаш йолаш я, дIахо царца болх дIахьоргба. Шин-кхаь шера гIулакх аттача дала дезаш да.
