«Зизай фестивале» котбаьннараш гӀадбахаб
Эггара хьалхара «Зизай фестиваль» яха республикански яхьаш дӀайихьар вай мехка. Вай мехкада Келаматанаькъан Махьмуд-Ӏаьла ва, уж яхьаш дӀахьо аьнна тӀадиллар. Котбаьннарий цӀераш яьхар кхелахоша укх деношка.
ГӀадбахача котбаьннараша дийцар, деннача ахчах шоаш фу де лаьрхӀа ба. Хьалхара моттиг яьккхача Эккажкъонгий-Юртарча Галай Зейнапа дийцар; шийна кхаьчача 300 эзар сомах коа кхуркхолг (фонта), Ӏам бергба ше, аьнна. ШоллагӀа моттиг яьккха 200 эзар сом кхаьча ГӀаьзе-Коара Албохчанаькъан Фатима Амстердамерча цӀихезача парках бӀаргтоха яха безам болаш я.КхоалагӀа моттиг яьккха 150 эзар сом ахча денна Эбарга-Юртара Цицкенаькъан Мовлатхан дог чӀехкаш, елха сакъувлаш яр, сов чӀоагӀа гӀадъяха. Из ахча ший вахаре хам баь яргйоаца доккха гӀо да, яхаш, дийцар цо. «Могаш воацаш кӀаьнк ва са. Цунна дарба де Петербурге яха езаш яр со. Тахан деннача ахчах тхона чӀоагӀа новкъостал хургда», — аьлар цо.
«Яхьашта юкъе дакъа лоацаш хиннача кхы а ворхӀ сага 50 эзар сом ахча лургда. Цу гӀулакха лаьрхӀа доакъашхошта сертификаташ луш йола йоккха кхетаче дӀахьоргья гуйран шоллагӀча бетта. Юртбоахама болхлой денна хетадаь вӀашагӀкхетараш дӀакхухьаргдола ха я из»,— дийцар тхога цу яхьий кулгалхочун гӀонча йолча Местой Хаде.
