«Магас-Шахьаре, 2024 шера саькура бетта ткъаь ялхлагӀча дийнахьа, Коталон 65 шу яхача урам тIа ГӀалгӀай Республике гӀолла йолча МВД ГИБДД ДПС инспектораша соцавир «Мерседес-Бенц» яхача машенаца, наьха цӀерах долча водительски тешалца воагӀа кхелатанза вола водитель.

Кастлуш, бокъонаш лораеча болхлошта ховш хилар цунна автомобиль лелае бокъо енна цахилар а, из лелае бокъо луш дола тешал цунга доацилга а. Иномарка чу хьежачул тӀехьагӀа, царна корабир цун тӀормиг, цига гучадаьлар тайп-тайпарча боахамашкара тешалаш, уж тамашийна хеташ дар. Иштта багажника чура гучаяьлар паччахьалкхен регистрационни таьрахьаш тӀадола массехк номер.

Иномарка дӀайигар мехка УГИБДД. Цу машена тӀехьа Ӏаьдала дӀадаланза 100 эзар сом совгӀа декхар латт, из декхар наькъа бокъонаш телхаяь хиларах теха гӀод да.

Белгалду, цу сага духьала д. 1 ст. 5. 35 КоАП административни протокол оттадаьд. Полици цу гIулакха тIа болх беш я.