ГӀалгӀайчен тохкамхоша хьаллаьцар, Россе хургдолчун тӀехьара болам
Дзейтанаькъан Беслан - Даьхе лораеш бейнача наьха дагалоаттама «Россе тохкамхой болама» моттигерча отделене кулгалхо, ГӀалгӀайчен ХӀарман палата доакъашхо, «ГӀалгӀайче - Даьхен Турпалхой Мохк» яхача проекта автор ший тоабаца ваха хилар, Россе президент хоржаш долча № 508 йолча даькъ тӀа кхадж тесса. Цу хоржамий даькъо Россе Турпалхочун Котанаькъан Ахьмада цӀи лелаю, из да ГӀалгӀайчен МагӀалбика кхален Инаркъера культуран ЦӀагӀа.
«Оаха тахан кхадж тосс мехка президент хоржаш, Россе хургдолчун тӀехьа. Из вай боккхача мехка лоархӀаме моттиг я, хӀара сага оаз эшаш а я. Цудухьа тхона гу цига дакъа лацар - тхоай декхар. Вай Даьхен дикача, турпалча исторе хьагойт; вайх цхьаккха а цу лоархӀамеча денна юстара хила йиш йоацилга»,-аьлар Дзейтанаькъан Беслана, ше «Сердало» газета викалца къамаьл деш.
Хоржамий даькъ тӀа МагӀалбика бахархой дика дакъа лоацаш хилар а белгалдир цо. Наха дика кхетаду, тахан дӀахьош дола хоржамаш мехкара хьал атта доацача ханашка дӀахьош хилар, цудухьа вай дика дакъа лоацаш хиларах тийша я Россе кхоане.
Дзейтанаькъан Беслана иштта белгалдир, массадолча хоржамий даькъ тӀа кхадж тоссаш дукха нах хилар, царна дола хьалаш дика вӀашагӀдехка хилар, МагӀалбика кхален даькъ тӀара болх ший бахьа безача боараме дӀахьар, массанахьа, эшача новкъостал деш, волонтёраш латтар, кхерамзлен Ӏалашо яр, боккхийча наха эшаш дола новкъостал дар.
МагӀалбика кхален хоржамий даькъ тӀа боккъонца дола цӀай дар, Къоастой Ӏаддал-Хьамид массахана балхага хьожаш хиларах.
