АЗС юхе саг лочкъаваьраш гучабаьхар мехкарча полице болхлоша
Наьсарерча машинашка доагор чудувттача моттига юхе саг лочкъаваь зуламхой гучабаьхар мехкарча полице болхлоша. Из хоам «Сердалога» бир МВД.
«Саг лочкъаварах дола зулам тӏатетташ вола 1993-ча шерара моттигера вахархо дӏалаьцар мехкарча МВД УУР болхлоша Наьсарерча Россе ОМВД, иштта Россе СКФО ОРЧ-2 ГУ МВД къахьегамхошца цхьана болх дӏабихьа», - йоах тхога бенача хоамо. Белгалдечох, укх шерарча бекарга бетта 7-ча дийнахьа Наьсарерча Тӏонганаькъан цӏерах болча урам тӏа, кхы а кхаь мехкахочунца, 30 шу даьннача шоай гоамал йолча сага тӏабеттабеннаб уж.
Герз тӏаувттадеш низагӏа машина чу хоаваь, шоашта юкъерча цхьанне цӏагӏа дӏавига; етташ, дӏа ца вохийташ, кхеставаьв цар из саг. Цу гӏулакха бехкеволчунца, хьалеха ӏочувига, болх дӏабихьаб ӏаьдала болхлоша, цунца хинна шиъ хьалхагӏа гучаваьккха ӏаьдала кара ва, карарча хана кхоалагӏа вола зуламхо лохаш ба МВД.
