Къаман библиотеке ухарашта гургда, наггахьа мара го йиш йоаца книжка
«ХVӀӀӀ бӀаь шу чакхдалале хинна Къилбаседа Кавказа къамий истори» яхаш чулоацам бола (академик Б.Б. Пиотровский редактор хинна) книжка го йиш я, ГӀалгӀайчен Янданаькъан Жамалдан цӀерагӀча Къаман библиотеке. 1988 шера, «Ӏилма» яхача издательстве кепа теха арадаьнна книжка; дукха ха я библиотекашка наггахьа мара доацача книжкаех цаӀ дола. Бакъда ГӀалгӀайчен керттерча библиотекан мехктохкама отдела болхлошта из корадаьд.
«Вай мехктохкамхошта из наггахьа мара ца нийслуш дола книжка гучадаьлар Воронежски областа И.С. Никитина цӀерагӀча бе-бе оагӀонаш чулоацача Ӏилман библиотеке. Воронежерча библиотекан болхлоша, тха дехар кхоачашдеш, «ХVӀӀӀ бӀаь шу чакхдалале хинна Къилбаседа Кавказа къамий истори» оцифровка а яь (кхычар а пайда эцаргболаш) хьадайтар. Оаха баркал оал царна из наггахьа мара нийслуш доаца йоазув цар вай бахархошка кхачийтарах», - аьлар «Сердало» газетага ГӀалгӀайчен къаман библиотекан зарбан болх лелабераша.
