Газ чуюллаш толхадаь урамера наькъаш, тоадергда Шолжа-Шахьаре
Дукха ца говш, тоадергда Шолжа-Шахьарера, газ чуюллаш дIабихьача балхо толхадаь урамера наькъаш. Из хоам «Сердало» газетага бир шахьара администраце.
«Цох лаьца дийцар шахьара да волча Ieмаранаькъан Аслана ООО «Газстрой», ПАО «Газпром» яхача моттигашкарча болхлошца. Кхетаче дакъа лоацаш хилар шахьара юкъарча совета кулгалхо Чопанаькъан Iийса, шахьара кулгалхочун гIонча вола Беканаькъан Халид, хIама хьакхоллара оагIон кулгалду Мержой Лема», - йоах тхогарча хоамо.
Iумаранаькъан Аслана белгалдир; йохаяь моттигаш тоаяь яллалца, газ чуйиллара болх юхасоцабергба, аьнна.
ООО «Газстрой» оагIон болхлочо дийцар, март бутт йистебалале толхадаь латта урамаш тоадергхиларах. Карарча хана, тоадара болх дIахьош латт 700 метрага кхоачаш долча Первомайски, Пионерски оалаш долча урамаш тIа.
Газ чуйиллара болх шахьаре дIаболабаьб, 2021-ча шера денз. Цу юкъа хийцай дукха тишъенна газа турбаш.
