«Укх деношка, Россе МВД ПДН, ОДУУП отдела кхелатанза барий гӀулакхах йола йоккхагӀа инспектор, полице майор Л. В. Чугина, иштта ГӀалгӀай Республике гӀолла йолча МВД ОООП отдела инспектор, полице лейтенант Эсмарзанаькъан З. И.,  ший йоӀаца Марийнайца, яха хилар Магасерча амбулаторе, цига эггара зӀамагӀдолча берашта маьхий тохаш бола болх дӀахьош бар», — йоах хьабайтача хоамо. 2023 шера саькура бетта 27 дийнахьа денз тушола бетта пхелагӀча денга кхаччалца, «Иммунитет чӀоагӀъеш» яхача программанна чубоагӀаш бар из болх.

Цу ден турпалхо яр пхи шу даьнна Марина, цо аьннадар ший наьнага- полице йоккхагӀйолча лейтенантага цхьа тӀадам бIаргех Ӏо ца божабеш, лорашка а яха, маха а теха юхайоагӀаргья ше, аьнна.

Берага лораш дика хьежачул тӀехьагӀа, маха тохийтара раьза я, аьнна, кулг яздир нанас. Цул тӀехьагӀа йиӀига хоза байташ а йийшар, лораш шоаш а цецбаьннабар. Ший нанна уллув а яьнна, лоалахарча кабинете Ӏочу а яха, йиӀига маха тохийтар, хӀанз цун могашала Ӏаткъаш хӀама а дац.

Цу тайпара йола прививка ца йича яргйоацилгах дийцар. ше интервью луш, ГӀалгӀай Республике гӀолла йолча МВД лорий-санитарий даькъ тӀарча лора Хамхой М.  Белгалду, иммунитет чIоагIъеш йола хьалхара аргӀа ГӀалгӀайчен санитарни лора Къамурзой Бориса амарца республикан доазон тӀа дӀайихьар.

Из ший ханнахьа даь хӀама да, хӀана аьлча из лазар чӀоагӀа даржаш хиларах, вайцига из хилар а гучадаьннад.

МВД викалаша, иштта лораша бахархошта хьалхадаьккхад, берий даьй-ноаной е царна доал эттараш, берашта цу унзарча лазара духьала маьхий тохийта ловш бале, шоаш бахача амбулаторе дӀабаха беза. Лазар хьакхийттачул тӀехьагӀа цунна дарба дечул, дикагӀа да из юхатохар.

Из цкъа хьакхийтача саг венна дӀаваллалца цунцара дӀакъастац, цул совгӀа заӀапхо хила тарлу из цу лазарах. Эггара дикагӀа цох лоравалар да маха тохар.

Цу лазара духьала маьхий тохарца бувзабенна болх дӀахьоргба цӀаькха а 2023 шера бекарга бетта (апрель) кхоалагӀча денгара ийслагӀча денга кхаччалца.