ГӀалгӀайчен МВД ветераний Кхела кулгалхочоа, Шилова преми елар
ГӀалгӀай республике гӀолла волча чурча гӀулакхий министра, полице инарал-лейтенанта Коробкин Михаила, балха тӀара мукъа волча милице полковника Котанаькъан Мухьмад-Салена елар Шилов Ивана цӀерагӀа преми, яхаш, дийцар «Сердало» газетага бокъонаш лораяраша.
Из совгӀат далара бахьан дар; ветераний болам дегӀабоалабеш, бокъонаш лораерашта социальни новкъостал деш цо къахьийга хилар.
Лауреата луча диплома кулг яздир Россе МВД ветераний Кхела кулгалхочо, полице инарал-полковника Овчинников Николая. СовгӀат дала кийчдаьдар Котанаькъанчоа «цо юкъарлон-пайданеча балха дика толамаш дахарах, вахара политика кхоачашъеш дика дакъа лацарах, доккхагӀа долча ноахала вахара хьалаш лакхдарах».
Коробкин Михаила белгалдир, Котанаькъан Мухьмад-Сале кулгалца, ГӀалгӀайчен чурча гӀулакхий ветераний Кхел, Россе гӀолла дикагӀчарех цаӀ хилар, цо дика хьаллаьцар балха тӀара мукъабаьнна полицейскеш, бейначар дезал, иштта дика дакъа лаьцар кагирхой Даьхенцара безам кхебеча даькъ тӀа.
