ИнгГУ викалаш дакъа лоацаш ба, наьна меттай олимпиадаш кийчъерий кхетачене
Москве ший болх дӏаболабир, РФ халкъа наьна метта, литературан дешархой Федеральни олимпиада вӏашагӏйолларий Ерригроссийски ӏV-ча конференце. Цига гулбелар берригача мехкара говзанчаш, хьехархой, ӏилманхой. Уж ба Россе дукха метташ леладеш хилара хьал лорадара тӏехьа бола нах. Гӏалгӏайчера цига бахар Гӏалгӏай паччахьалкхен университета гӏалгӏай метта кафедра хьехархой Овшанаькъан Э., Мутаӏаланаькъан З.
«Гӏалгӏайчен вуза викалаш цига дакъа лоацаш хиларо таро лу гӏалгӏай мотт дикагӏа бовзийта, лорабе. Из иштта накъадоалаш да наьна метташ дегӏадоаладара балха даькъ тӏа, халкъашта юкъера бувзам лелабара; цул совгӏа, цига дешархошта лаьрхӏа олимпиадаш дӏаяхьара хаттараш дикагӏа вашагӏдохка таро хул», - аьлар «Сердало» газетага ИнгГУ.
Кхетаче хьалхара ди дӏадахьара чудоагӏаш дар, РФ Халкъа Гуллама Федераце Совета российски сенаторашца цун доакъашхой вӏашагӏкхетар. Цига дийцар къаман метташ хьаллацара, кагирхошта юкъе олимпиада болам лелабара даькъ тӏара дешаш.
