Селий мехкарча бахархошта гӏо дарах, белгалваьккхар вай мехкахо
Ӏаьржа хий дарах хатар хиннача хана, селий мехкарча бахархошта гӏо де бахараш белгалбир, Кавказа инвестицей кхетаче дӏахьоча хана. Республиканнна кулгал деча Меликов Сергейс доккха баркал кхайкадир тайп-тайпарча моттигашкара цига новкъостал де баьхка хиннарашта. Хатара юкъе нийсбеннача наха доккха гӏо деш къахьийга МЧС колледжа хьехархо Галай Асхат белгалвир цига.
«Кавказе дахача къамашта юкъера вошал гойташ дола хӏама да из. Моллагӏа хало тӏакхаьчача вӏаший тӏаотта дезарех да вай. Вай – цхьа дезал ба, доаккхал деш ва со тхьоврача хана денз, вошал леладеча селашта новкъостал де вӏаштӏехьадаьнна», - дийцар «Сердалога» Галай Асхата.
Хатар эттача моттигашка эггара хьалхарчарца гӏо де оарцагӏъухарех ва из саг. Колледже дешаш болча студенташта дӏагойт цо, МЧС болхлошца эггара керттердар моллагӏа хӏама нийсденнача моттиге наьха хьал аттачахьа даккха сихвалар долга.
Къилбаседа Кавказа мехкашта юкъера барт, бувзам чӏоагӏбеш хилар из гӏулакх. Доккхача хатара кӏалбисача селий мехкарча бахархошта дӏахайтар вай мехкахочо, ийшача хана гӏо де отта кийча волга.
