Вай мехкарча СКР эпсар, совгӏат луш, белгалвир Россе Президента
Даьхен гӏулакха бехктокхаме къахьегарах йола ӏӏ дозала ордена майдилг луш белгалвир юстице подполковник, мехкарча РФ Тохкама комитета тохкама оагӏон къаьстта лоархӏаме долча гӏулакхех долча даькъа кулгалхо вола Доврбиканаькъан Заур. Россе Президента амарца белгалвир дукхача шерашка бокъонаш лораеш, нийсхо хьаллоацаш, ший декхараш дизза кхоачашдеш хьавоагӏа вай мехкахо.
«Сердалога» бенача хоамах, къамий цхьоагӏон Ден хетаяь Россе СК Москве дӏайихьача лоархӏамеча кхетаче хилар из гӏулакх. Гӏалгӏай эпсара из паччахьалкхен совгӏат хьаденнар вар РФ Тохкама комитета кулгалхо, юстице инарал Бастрыкин Александр Иванович.
Белгалде деза, Доврбиканаькъан Заура кулгал деш болча оагӏон болхлой геттара лоархӏаме, хала лоархӏаш долча гӏулакхашца къахьегаш болга. Цу юкъе да сага, паччахьалкхен ӏаьдала духьалара, иштта экономикан оагӏонцара зуламаш. Ший гӏулакх боаггӏача боараме лорадеш хиларца белгалваьнна ва вай мехкахо.
Цунца цхьана къахьегараша тахан белгалдечох, РФ Тохкама комитетá мехка хьалха латтараша тӏадехка декхараш кхоачашдара оагӏонца, иштта республикера хьал лорадара тӏехьа хьинаре болх дӏахьорех ва ала деза цох.
