Гӏалгӏайчен прокуратуро новкъостал дир 72 шу даьннача яхархочун пенси меттаоттаде
Магас-Шахьара прокуратуро кхоачашдир 72 шу даьннача кхалсага пенси хьадаларца дувзаденна хаттар, яхаш, дийцар «Сердало» газетага республикан тӏахьожама боахаме.
«Белгалду, из кхалсаг 2008 шера денз, страховой пенси хьаийдеш хиннай. 2023 шера наджгоанцхой бетта Волгограде гӏолла йолча Российски Федераце пенсионни ганзо, вахара кхерамзлен чуйоагӏача кхелахой центра кулгалхоша лаьрхӏар цун пенси 8 эзар сома кӏезигде. Цун бахьан дар из хьалхагӏа 1986 шера наджгоанцхой беттагара 1990 шера оагӏой беттага кхаччалца болх баь йола ха шеко йолаш хилар», - аьлар хоамо.
Из бахьан долаш прокуратуро лоткъам чубелар хьалхагӏа хинна пенси меттаоттадар, соцадаь лаьтта ахча хьадалар дехаш. Гӏалгӏай Республикан Магасерча судо из кхоачашдир, хӏанз пенси ше хиннача боараме хьалуш да. Цул совгӏа хьалха соцадаь лаьтта 335 эзар сом а хьаделар.
