Хи тIара тIий тоадеш латт Илдарха-ГIалий тIа
07.11.2023 12:35
Боккха болх дIахьош, тоадеш латт Илдарха-ГIалий тIарча Шолжа лакхера тIий. Лакхача боараме йистебаккха безаш болх ба из тахан. Из хоам «Сердало» газетага бу мехка кабмине. «Кхераме доаца дика наькъаш» яхача къаман проектага гIолла дIахьош ба из беркате болх.
«Таханарча дийнахьа, цхьаккха кхоачамбоацараш юкъе ца доалаш, дика дIахьош латт из гIулакх. Къахьийга баьлча, лакхача боараме дола, дика тIий хургда хин лакхе»,- йоах тхога бенача хоамо. Цу балха тIахьожачар яхачох, оттаяьча ханал дикка хьалхабаьнна, проекта-ахчан каьхаташка хьежжа дIахьош латт тIаьцара болх. Хаоттам телха болх ца хуле, ер шу йистедалалехь, тоадаь даргда тIий, Даьла къахетамца.
